ദോഹ:വിദ്യാർത്ഥികളുടെ അന്താരാഷ്ട്ര വായനാശേഷി മൂല്യനിർണ്ണയ പഠനമായ 'പേൾസ് 2026' (PIRLS - Progress in International Reading Literacy Study) ആറാം പതിപ്പിന് ഖത്തറിൽ തുടക്കമായി. വിദ്യാഭ്യാസ ഉന്നതവിദ്യാഭ്യാസ മന്ത്രാലയത്തിന്റെ മേൽനോട്ടത്തിൽ രാജ്യത്തെ പൊതു-സ്വകാര്യ മേഖലകളിലെ 278 സ്കൂളുകളാണ് ഈ അന്താരാഷ്ട്ര പരീക്ഷയിൽ പങ്കാളികളാകുന്നത്.
​നവംബർ 2 തിങ്കളാഴ്ച ആരംഭിച്ച മൂല്യനിർണ്ണയ പ്രക്രിയ 2026 ഡിസംബർ 3 വരെ നീണ്ടുനിൽക്കും. ഖത്തറിലെ അഞ്ചാം ക്ലാസ് (Grade 5) വിദ്യാർത്ഥികളെ ലക്ഷ്യമിട്ടാണ് ഇത്തവണത്തെ പരീക്ഷകൾ സംഘടിപ്പിക്കുന്നത്.പങ്കാളിത്ത സ്കൂളുകളിൽ രാവിലെ 8 മണി മുതലാണ് പരീക്ഷാ സെഷനുകൾ ആരംഭിക്കുന്നത്. സ്റ്റുഡന്റ് അസസ്മെന്റ് ഡിപ്പാർട്ട്‌മെന്റിലെ ഇന്റർനാഷണൽ ടെസ്റ്റ് സെക്ഷനാണ് ഇതിന് നേതൃത്വം നൽകുന്നത്.
പരീക്ഷ അന്താരാഷ്ട്ര നിലവാരത്തിലും കൃത്യതയിലും നടക്കുന്നുവെന്ന് ഉറപ്പാക്കാൻ മന്ത്രാലയത്തിന്റെ ഫീൽഡ് പരിശോധനകളും നടക്കുന്നുണ്ട്.ഇന്റർനാഷണൽ അസോസിയേഷൻ ഫോർ ദി ഇവാലുവേഷൻ ഓഫ് എഡ്യൂക്കേഷണൽ അച്ചീവ്‌മെന്റ് (IEA) അഞ്ചു വർഷത്തിലൊരിക്കൽ നടത്തുന്ന പഠനമാണിത്. വിദ്യാർത്ഥികളുടെ വായനാശേഷിയും ഗ്രഹണശേഷിയും അളക്കുകയാണ് ഇതിന്റെ പ്രധാന ലക്ഷ്യം.അന്താരാഷ്ട്ര തലത്തിൽ സാധാരണയായി നാലാം ക്ലാസ് വിദ്യാർത്ഥികളിലാണ് ഈ പഠനം നടത്താറുള്ളതെങ്കിലും, അന്താരാഷ്ട്ര സംഘടനയുടെ പ്രത്യേക അനുമതിയോടെ ഖത്തറിൽ ഇത്തവണ അഞ്ചാം ക്ലാസ് വിദ്യാർത്ഥികളിലാണ് പരീക്ഷ നടത്തുന്നത്.
​അന്താരാഷ്ട്ര തലത്തിലുള്ള ഇത്തരം വലിയ മൂല്യനിർണ്ണയങ്ങളിൽ നിരന്തരം പങ്കാളികളാകുന്നതിലൂടെ രാജ്യത്തെ വിദ്യാഭ്യാസ നിലവാരം മെച്ചപ്പെടുത്താനും വിദ്യാർത്ഥികളുടെ പ്രകടനം വിലയിരുത്താനും സാധിക്കുമെന്ന് വിദ്യാഭ്യാസ മന്ത്രാലയം വ്യക്തമാക്കി.